هى : احمد مش الى بينتحر مش بيموت غير لو ربنا مقدرله طب ليه بيدخل النار ما هو اصلا مش بيتحكم فى حياته ما هو ربنا لو عايزه يدخل النار هيسيبه يموت صح ؟
  هو انا ربنا بيحبنى عشان كل مره بحاول بفشل و لا مش بيحبنى و عايز يعذبنى ؟
 طب انا ليه ضعيفه لدرجه انى حتى مش قادره اعيش على طول جوايا رفض للدنيا ليه بفهم كل حاجه بمليون معنى و بيتعبنى التفكير ليه مش بنام مرتاحه مش بفكر فى حاجه هو انا كده عايشه ؟ بيقولوا دى اسعد ايامنا هو العقل ده نعمه ؟؟ انا مش عايزاه 
  انا كبرت ليه اصلا ؟
من جوايا رافضه كل حاجه و فى نفس الوقت مستسلمه بخاف من النظرات اوووووى ... بحس انها بتقتحمنى
 انت فاهمنى صح ؟ عارف لو مش عندك وقت متردش انا مش عايزه رد انت بس احسن حاجه فيك انى بحسك انا او يمكن لو اتكلمت مع نفسى هلخبطها اكتر .

انا :

صباح الخير يا بنت المجنونة اولا :)

انا مبسوط انك بتفكرى بالشكل دة

و بتسئلى الاسئلة دى

انتى على الطريق الصح :)

من وجهة نظرى الى ربما تكون غلط و ربما تكون صح . الله اعلم . ان لكل أجل كتاب

كل واحد مكتوبله هيعيش كام سنة و كام يوم و كام ساعة و كام ثانية

محاولات الإنتحار ربما تفشل و ربما تصيب

المقياس لدة ايه ! مش عارف و مش قادر افهمه

يعنى مثلا لو واحد رمى نفسه من الدور العاشر . احتمالات نجاته هتكون اد ايه !

فى موت سريع و فى موت بطئ

واحد مثلا شنق نفسه . نسبته نجاته اد ايه ؟

الغريب فى الموضوع بقى ان محدش يقدر يجزم بان الى يرمى نفسه من الدور العاشر

او يشنق نفسه

انه هيموت بالفعل

شخصيا حصل معايا شئ خلانى اعيد حساباتى فى كل شئ

من بتاع 5 او 6 سنين كدة

كنت بمر بأزمة نفسية عنيفة شوية و نوبة اكتئاب حادة خلتنى انصب لنفسى مشنقة على الجانش بتاع النجفة الى فى اوضتى و الى ياما علقنا عليه خرفان و عجول

و انا كلى على بعضى مكملتش ال 70 كيلو

و الى حصل ان الجانش اتفتح

مش اتكسر

ولا وقع

لاء

الحديد اتفرد

!!!!

شئ خلانى مذهول

استحالة يكون دة حصل من نفسه

دة لو بشر كان اتدخل و حاول يعمل كدة مكنش قدر

دى قدرة و قوة اكبر

و ادينى اهو

مموتش

بمشيئة ربنا

الى عايزنى اكمل فى الحياه الدنيا

طب انت عايزنى اكمل ليه يا رب ؟

دة السؤال بقى

انت عايزنى اكمل ليه يا رب !

معتقدش انه غاوى يعذبنى يعنى

اصله هيستفاد ايه يعنى لما يعذبنى !

هيستفاد ايه من وجودى فى الدنيا اصلا

ماهو لو عايز يعذبنى كان سلب منى الحياة

و الى هى فى الحقيقة اعظم موهبة فى بنى آدم من ربنا

موهبة الحياة

الحياة ربنا وهبلنا و قال سيروا في الأرض فانظروا كيف بدأ الخلق ثم الله ينشئ النشأة الآخرة إن الله على كل شيء قدير

سورة العنكبوت الاية 20

ماهو قادر يسلب مننا الحياة دى و الى هى فى الحقيقة فرصة مدهالنا ليبلوكم أيكم أحسن عملا وهو العزيز الغفور

ياخد مننا موهبة الحياة و نكون شئ منسى فى الدنيا . ميكونش لينا وجود

و تبقى روحنا عنده

وسائل التعذيب هناك اكتر

نار بقى و بتاع و نشوف ايام سودة

وقتها بقى كان لازم وقفة كدة

و نشوف هو ايه الحكاية بقى

هو ربنا قالك " سيروا في الأرض فانظروا كيف بدأ الخلق "

و هو دة بقى مربطالفرس

كيف بدأ الخلق

انت خلقتنا ليه يا رب

هنا رد عليكى و قالك " أَفَحَسِبْتُمْ أَنَّمَا خَلَقْنَاكُمْ عَبَثاً وَأَنَّكُمْ إِلَيْنَا لا تُرْجَعُونَ " ؟

هو انتوا فاكرين انى خلقتكم كدة و خلاص و انكم مش هترجعوا ليا

لاء اصحوا كدة و فوقوا

امال فى ايه طيب !

انا عايز اعرف

عايز افهم

عايز اوصل

كل الى انتى فيه دة طبيعى

دة هو دة عين العقل

اسئلتك دى انتى بس الى تقدرى تجاوبى نفسك عليها

انتى بس و مش حد غيرك

انظرى كيف بدأ الخلق

امسكى كتب تاريخ الانسانية و دورى فيها

بصى ع الناس حواليكى و دورى فيهم

تأملى الحياة

حقيقى مش بهزر

تأملى الحياة

هتلاقي فيها حاجات لا يمكن تكون طبيعية

اخرجى من مخزنك الى مخزنة نفسك فيه

انزلى و اخرجى و سافرى و اتنططى

متضيعيش فرصة تقدرى تشوفى فيها شئ او تعيشى فيها لحظة جديدة

اتعرفى على الحياة بشكل اقرب

على خلق الله

خلق الله من كل شئ

ارض و سما و بحر و ناس و زرع

و طيور

كله كله

هتعرفى معنى الجمال

ربك لما خلق الارض خلقها جميلة

بس احنا ولاد وسخة

خلناها اقبح ما يُمكن

معنى انك لسة عايشة

و لسة فيكى نفس

برغم محاولاتك التخلص من حياتك

يبقى فى سبب قوى من ارادة ربنا فى بقائك

السبب دة موجود جواكى

فى موهبة ربنا واهبهالك

ابعدى عن القبح و قربى من الجمال و الفطرة الى ربنا خالقها و ادى لنفسك الفرصة انك تفهمى

اما بقى بخصوص السعادة

فـ الموضوع فى غاية السهولة

اعرفى قدراتك ايه

و احلمى احلام تتناسب مع قدراتك

و حققيها

هتنتشى

قمة النشوة و السعادة هى نشوة الانتصار

الانتصار بتحقيق انجاز شخصى

الى ممكن يكون حاجات بسيطة جدة

و ممكن يكون حاجات كبيرة جدا

انك يبقى نفسك فى اكلة و تجمعى اصحابك و تاكلوها مع بعض دة انجاز

انك يبقى نفسك فى خروجة او مكان تروحيه و تلمى اصحابك و تروحى دة انجاز

انك تقرى و تعرفى معلومة جديدة او تفهمى شئ مكنتيش فهماه دة انجاز اكبر

انك تحلمى . و تحققى حلمك دة انجاز عظيم

السعادة هى مقدار الرضا عن النفس

مقدار الرضا عن النفس = الرغبة فى تحقيق شئ - الى تحقق فعلا من الشئ دة

مقدار سعادتك بيتناسب طرديا مع حجم حلمك

كل ما كان حلمك اكبر كل ما سعادتك هتكون اقل

لان طريقك هيكون طويل

 الخلاصة فى كل الكلام دة :

 " حياتك فيلم طويل لسة أحداث كتير المفروض فيه يحصلوا 
.. حياتك فيلم جميل ، يا تقعد ع القهوة وتتفرج عليه ياتقوم حالا وتمثله . 
إركب قطر الدنيا .. طلع راسك من شباكه عشان تتفرج ، و اوعاك تزعل لما دماغك تخبط في العواميد و سنينك تتدحرج من شباك القطر . 
في لعبة الحياة .. لما حاجة تزعلك أرجوك ماتكتئبش 
.. هي اللعبة كده مافيهاش حلول وسط .. يا تتلعب يا ماتتلعبش . 
للأسف مشكلتك مالهاش حل .. جنونك عاقل جداااا .. بس عقل العاقلين من حواليك . مُختل " اقتباسات من منمات غجرية

لحظة خاصة

فاكر اول لمسة ايدك لمستهلها . و ازاى كانت مكسوفة . و بتسحب اديها بالراحة فى خجل و تردد :)
فاكر اول كلمة بحبك . و ازاى لما سمعتها روحى انسحبت منى . و ازاى كنت بتلكك عشان اقولهلها ،
فاكر اول بوسة بوستهلها . و ازاى مسكت ايدى وقتها . و ضمتها جامد فى ذهول . و دمعة على خدها .
لحد دلوقتى مش عارف افهم ليه دمعت و ليه مسكت فى ايدى اوى كدة و ضمتها .
كانت لحظة متتنسيش :)
فاكر لما كنا بنعد نتكلم فى التليفون بالساعات و فى الاخر نسأل نفسنا احنا اتكلمنا كل دة فى ايه و جبنا كلام منين :)
فاكر لما كنا بنفهم بعض بالسكات . من صوت نَفسنا
فاكر لما حضنتها و ازاى كانت جوايا
.. فاكر لما كنت بحبها

لما تبقى مهموم قلب فى ذكرياتك . اكيد هتلاقى شئ يخليك تبتسم من قلبك :)

عن الوحدة ( بكسر الواو )

 عن اللحظة الى يتوه منك فيها الكلام .

عن اللحظة الى وهمك فيها بيهيئلك ان تليفونك بيرن و تجرى عليه تلاقيه زى ما سبته .
عن اللحظة الى بيبقى نفسك تبكى فيها . بس دموعك بتخونك و مبتنزلش .

حتى دموعى !

عن اللحظة الى يتوه منك فيها الكلام .

.. عن صحاب طلعوا مش صحاب .
و احباب طلعوا مش احباب .
عن ناس باعت و ناس فارقت و ناس سبناهم و ناس ضيعناهم

عن ناس ميتعوضوش .

عن لحظة تغمض فيها عينك تعصرها بصوابعك .

عن مليون قناع و 100 وش .

عن ضحكة من هَم .
و ابتسامة على غَم .

 عن حلم لسة طريقك فيه طويل . ماشى فيه لوحدك

عن حيرة جواك . يا ترى انا الى صعب ولا محدش عايز يفهم

عن اغنية لمنير .

عن اللحظة الى يتوه منك فيها الكلام .

يا ليتنى كنت تراباً

عارف ايه افضل شئ فى الموت !
لما روحك تفارقك جسدك . .. تقلع بدلتك الفضائية دى .
يتلاشى شكلك . لونك . املاكك .
تكون عظم ملفوف فى حتة قماشة بيضا وسط تراب .
مجرد عظم .
بعد ما الدود يتغذى على كل ما هو بداخلك .
يُمحى اسمك من جداول المقيدين .
يُمحى اسمك من جداول اصحاب الحقوق .
..
وحيد تكون . لا تتوفر لديك اى وسيلة للتمتع بالمتع الدنيوية الملموسة .
مفيش طريقة تقدر تضيف بيها فكرة .
مفيش جسد ماشى تقدر تساعد بيه حد .
غير مُطالب بشئ . فـ انت وصلت لنهاية الطريق و التى ربما تكون بداية لطريق آخر ، ربما اكثر مشقة ، او يكون اكثر راحة .
..
..
عارف ايه افضل شئ فى الموت ؟
انك مش هتقابل حد يبتسم فى وشك من ورى قلبه .
مش هتضطر انك تسمع لغو ملهوش اى تلاتين لازمة .
هيكون عندك القدر الكافى للبكاء على ما اقترفته فى حق البشرية .
..
..
عارف ايه افضل شئ فى الموت ؟
انك مش هتضر انك تبرر .
مش هتضر لأنك تكون مستعجل .
مش هتحتاج انك تنزل الصبح بدرى عشان تجيب لقمة عيش لعيالك . او انك تروح تحضر محاضرة ثقيلة ملهاش اى تلاتين لازمة .
..
عارف ايه افضل شئ فى الموت ؟
. انك اخيراً هتعرف قيمة نفسك

ازاى مينفعش !!

ثقتى بـ ان مفيش شئ مينفعش . او شئ صعب . او شئ مستحيل .. هو بالظبط نفس ثقتى بـ ان امى جابتنى من ابويا مش من حد تانى .
على مر السنين الضئيلة الى عشتها . كل يوم بيزيد ايمانى فى قدرات الثقة فى النفس .
الثقة فى انك تقدر . انك تعرف .. و لو متعرفش تقدر تتعلم ، يعنى مفيش شئ صعب .
بالعكس تماماً
هحاول ابسطلك الفكرة . بس انت كمان حاول تفكر فيها .

حياتك الحالية ما هى إلا مجموعة من المواقف حصلت فى وقت قبل كدة . وقت سابق . فى الماضى . و على اساسها انت بقيت هنا دلوقتى .
الماضى دة ممكن يكون من دقيقة فاتت . او حتى من ثوانى .
دوس على زرار النور هتلاقى النور اتطفا . او ولع . .. انت قمت بفعل شئ على اساسه كان فى رد فعل .
الشئ الى انت قومت بيه دة هو كان نتيجة فكرة .
مجرد فكرة ..
فكرة انك عايز تولع النور . او تطفيه . ﻷى سبب كان . .. الفكرة تحولت عندك لرغبة . الرغبة اترجمت فى فعل ..
و لأنك شايف ان الموضوع سهل . و بسيط . انك تطفى النور او تولعه . اخدت قرارك و دوست ع الزرار . قومت بالفعل فعلاً . و كانت نتيجته ان النور ولع او اتطفى . .. يعنى حصل رد الفعل المُتوقع .

فى نفس الوقت انت لو مر على ذهنك فكرة مثلاً انك عايز تعمل الشئ الفلانى . اياً كان الشئ دة .
اعرف انك هتقدر تعمله . لأنك عملت من شوية . لما طفيت النور او ولعته . انت قومت بمجموعة خطوات
الخطوات دى مبتفرقش و مبتفهمش ان كان الشئ دة كبير ولا صغير .
يعنى بكل بساطة . زى ما قدرت تدوس ع الزرار و تولع النور . تقدر تعمل اى شئ تانى .

كيف للمستحيل أن يهزمنى و أنا عاشق المستحيل ؟

الوقت الآن باكر جداً
إنها السابعة و الخمس و اربعون دقيقة صباحاً
فبعد جلسة هاتفية طويلة استمرت الساعات
انا الآن انتظر و بفارغ الصبر إسدال ستائر صباح هذا اليوم و ظهور خطوط المساء ليوم جديد مع من أحب
و فيما انا هائم فى الوقت و مشغول بالأنتظار
جائت ببالى فكرة قد استحضرتها من الماضى الذى لم اتذكر منه شئ

قمت بعمل بحث بسيط على الشبكة العنكبوتية
و سئلت عم جوجو
قكان جوابه
" العذراء مع العذراء يتتميزان بنفس الطباع؛ فهما عفيفان وفاضلان، الارتباط بينهما لا يؤدّي دائماً إلى نتائج إيجابية، فلذالك ينبغى أن تكون هناك بعض الفروق التى لا تفسد للودّ قضية.يتصفان بالعناد وتمسّك كل منهما بنظرياته الخاصة غير مهتمّ بآراء الآخَرين، وهذا يجعل الحياة بينهما شبه مستحيلة"
و بعد حكة بسيطة فى الرأس ..
حبيبتى
أنا عاشق المستحيل
أنا اعشقك


Thursday, 18 November 2010 at 06:57

اصبحنا مجموعة من القرود . العالم كله بيتطور و احنا شوية قرود عايشين ع الموز الى بيترميلنا . فتات التكنولوجيا الى بيوصلنا و عمالين نتخانق مع بعض على مين جاب ايه و مين عمل ايه . و كأنه من صنعه . كانه هو الى عمله !
عمالين نخطف من بعض بدون حتى ما نفكر الى بنعمله دة فى صالحنا الشخصى حتى ولا لاء .
بكل الطرق و بكل الاساليب حتى و لو كان فى مقابل ارواح بنى آدم الى من نفس جنسك ..
المهم هتاخد ازاى .
ازاى تلم اكبر قدر من كل شئ .
و تناسينا قول ربنا " الهاكم التكاثر " .
تكاثر المال و تكاثر البنين و تكاثر الشهرة . التكاثر فى كل شئ . التكاثر اللا متناهى .
" كلا سوف تعلمون . ثم كلا سوف تعلمون . كلا لو تعلمون علم اليقين . لترون الجحيم "
لو تعرفوا مقدار الدنيا دى ايه .
دى ولا حاجة !
شئ تافه جدا ولا يساوى كل التكالب دة عليها
هتعيش كام سنة تانى فوق الى عشته ؟
10 سنين ؟ 20 سنة ؟ 100 سنة تانى ؟؟
طب و بعد كدة هتروح فين ؟ و هيفضل ايه من الى لميته !
كلا لو تعلمون علم اليقين .
.. الشئ الوحيد الى بيفضل هو عملك . و اصبحنا مجموعة من القرود .  العالم كله بيتطور و احنا شوية قرود عايشين ع الموز الى بيترميلنا