من اول السطر

و نقول تانى نقطة و من اول السطر و السطر يجرى زى القطر نحط سن القلم ع الكراس يحكى حكاية حب ماتت خلاص يحكى سنين و سنين و سنين و يقول انين فى حكاوى حنين يحكى قلب مات و انكسر ولا يقول موال فى واحد حب ناس بايعينه بقلوبهم ناسينه و يحط تانى نقطة و يرجع اول السطر يقول كان يا مكان و اشهد يا زمان على عمرى الى عدى قوام طب فاكر يا زمان لما كان و كان و كان ؟ طب فاكر حبايبنا الى كانوا لينا فى الدنيا امان ؟ و يمشى قلمى و يخلص حبره و لسة جوايا اسئلة .
بصيت لحالى و قولت مالى يا عالم فى ايه مش كدة . وعدت ناس و ودعت ناس و فى الدنيا ولا فين المشكلة .
شردت منى و نسيت شرودى ببوسة كانت ع البحر فى الخفا و لمسة ايد بعد شوق متلهفة و دة حضن و ايه تانى طب ليه يانى يا دنيا فى قلوبنا بقت المشكلة
و مسكت قلمى و بدأت ارسم لقيتنى بكتب
” من اول السطر “